Раде Јовчевски – Корчагин

Тргнувањето во градинка е едно ново искуство за детето, без оглед на возраста. Некои деца прв пат се двојат од своите родители и градинката преставува прва алка во ланецот наречен
СОЦИЈАЛИЗАЦИЈА.
Адаптацијата, е широк поим и за возрасните и за децата. Не се работи само на адаптација на децата во градинка, овој поим е потребно да се разгледува од повеќе агли:
1. Привикнување на децата за во градинка
2. Адаптација на родителите на градинката
3. Адаптирање на учителките на новозапишаните деца
📌АДАПТАЦИЈА НА ДЕЦАТА НА НОВА СРЕДИНА
Ако мислите дека постои волшебна формула по која детето брзо и лесно ќе се адаптира на градинката, ќе морам да ве разочарам. Процесот многу често е долг, макотрпен и стресен за детето, родителите и за учителките.
Постојат деца кај кои оди лесно а има и деца на кои многу тешко им оди адаптацијата. Тоа зависи од многу фактори: од возраста на детето, од начинот на кој се однесуваме како родители во домот, од досегашното детско искуство, од тоа дали во групата има некое познато дете, од тоа колку се дружите и колку се дружи вашето дете со други деца.
📌АДАПТАЦИЈА ВО ЈАСЛЕНИ ГРУПИ
Плачењето може да трае многу долго. Некои деца се смируваат после октомври, а некои плачат до второ полугодие. Сеуште се врзани за родителите (посебно за мајката), страв од непознати лица. Пробуваат да разберат зошто се оставени „сами“, немаат поим за времето и многу се исплашени.
Децата на оваа возраст сакаат рутина, и многу е важно да ги носите секој ден без прескокнување на денови (на пр. два дена го носите па ќе прескокнете ден а потоа повторно ќе го донесете). Се навикнуваат на ритамот на денот кој ретко или никогаш не се менува: секогаш во исто време доручек, ужинка, активности, менување пелени, спиење. Ако дојде до промени, повторно се чуствуваат збунети и несигурни, затоа промените не се препорачуваат.
📌АДАПТАЦИЈА НА ДЕЦА НА ПОГОЛЕМА ВОЗРАСТ
Без оглед на нивната возраст и постарите деца можат да се чуствуваат несигурно во градинка. Новата средина ги збунува и им предизвикува страв. Се случува во домот да се договорите со вашето дете дека се ќе биде добро, но кога ќе осети дека се разделувате од него доаѓа до хистерија, плачење, тага.
Она што родителите како родители можат да го направат за своето дете е:
• Да се распрашаат кај идните учителки за ритамот на денот и полека да го применува во домашни услови барем месец дена пред да почне во градинка: исто време за будење, миење на раце, доручек, спиење, ручек, играње итн…
• Често одење во парк може да помогне на вашето дете полесно да се социјализира со непознати деца
• Ако е возможно запознајте го детето со учителките, со градинката и околината на градинката
• Договорете се со учителката да донесете омилена играчка на детето или ако имате играчка која повеќе не ви е потребна, да ви дозволат да ја оставите во градинка
Секоја градинка и секоја учителка има свои правила, но најчесто за време на адаптацијата односно во првите денови детето престојува во градинка само саат или два, па престојот постепено се зголемува.
На крајот од денот поразговарајте со детето за градинката, за новите другари, за тоа што му се допаднало во градинка. Ако сте во можност играјте ја играта која што детето ја научило во градинка, бидејќи ова е еден од начините адаптацијата да помине што по безболно за вашето дете.
Педагог,
Татјана Михајловска