Совети за родители

Во градинката „ЈУДГ Раде Јовчевски Корчагин“ особено големо внимание се посветува на соработка со родителите во „животот и работата во градинката“. Се негува партнерскиот однос градинка – семејство се остварува квалитена комуникација на релација родител – дете – воспитувач – негувател. Тоа води кон подобро разбирање на секое дете, задоволување на неговите потреби и интересирања. Сето тоа на крајот резултира со среќно и задоволно дете, кое правилно расте и се развива.

Водич за родители

1. Адаптација на децата во градинката – флаер за адаптација може да подигнете при упис на детето во градинка
2. Како да го навикнете двегодишното дете на нокшир – флаер може да подигнете при упис на детето во градинка
3. Здравствени препораки
4. Обврски на родителот кон градинката
ШТО ТРЕБА ДА СЕ ДОНЕСЕ ПРВИОТ ДЕН ВО ГРАДИНКА?
– Ранец со резервна облека;
– Патики за во градинка;
– Омилената играчка или предмет на детето, од дома (доколку детето ја има).
КАДЕ НАЈНАПРЕД ДА СЕ ОБРАТИТЕ?
Кај раководителот или одговорната негователка / мед. сестра на Објектот, тие ќе Ви ги дадат сите потребни информации за престојот на детето во градинката.

Соработка со градинката

За се што Ве интересира во врска со тоа:
– Како Вашето дете се прилагодува на градинката;
– Како и во колкава мера се вклучува во активностите;
– На кој начин стекнува нови знаења, умеења и вештини;
– Како соработува со другарите;
– Како реагира во конфликтни ситуации;
– Како се снаоѓа во нова ситуација;
– Во кој домен од развојот е најдобар, а каде му е неопходна помош и поттикнување.
За се она што се случува во групата, можете да дознаете од воспитувачот во група, преку:
– Разговорот што ќе го направите со воспитувачот-негувателот во групата, при носење и земање на детето во градинка;
– Индивидуален разговор што ќе го закажете со воспитувачот во група по Ваше или негово барање;
– Огласна табла или пано за родители, кое Ве молиме редовно да го консултирате, бидејќи таму ќе најдете многу интересни содржини за актуелните случувања во градинката;
– По пат на телефонска или писмена комуникација со воспитувачот во групата; (Внимавајте! Ако Вие постојано ѕвоните ние не можеме да работиме. Кога ќе се јавите бидете кратки. Ценете го нашето и Вашето време).
– Работилница за родители;
– Родителски сосотанок.

Организација на работата на градинката

Во градинката „ЈУДГ на ОЦ Раде Јовчевски Корчагин#, во која доаѓа Вашето дете, децата се распоредени по воспитни групи.
Со нив работат, стручно оспосбени кадри: негователки и воспитувачи, во постојана корелација со директорот, педагогот, музичкиот педагог, логопед, дефектолог и други стручни лица по потреба.

Добредојдовте

За време на уписот го запознавме Вашето семејство, потребите, навиките и карактеристиките на самото дете.
Подготвивме сигурна и поттикнувачка средина за правилен раст и развој на Вашето дете.
Доколку имате потреба од стручна помош, обраттете се кај воспитувачот или педагогот на градинката.
Обврски на родителот кон градинката
На почетокот на месецот ќе добиете уплатница за изминатиот месец која треба да ја платите најдоцна до 20ти во месецот.
Задолжително при носење на детето во градинката, родителот мора да го најави своето доаѓање на домафон, а потоа и лично да го предате детето на учителката од групата. Исто така важно е да се знае дека детето од градинката го земаат родителите, или друго овластено возрасно лице од родителот, по предходна најава на учителките во групата (денес моето дете ќе го земе баба му!).
Во случај детето да е болно, родителот треба задолжително да ги извести учителките во групата, а по враќањето од боледување, задолжително да донесе медицинска белешка, дека детето е здраво и може да посетува градинка).
Отпишувањето на Вашето дете највете го еден месец однапред (во спротивно сте должни да ја платите уплатницата)
За пријатен престој на детето во градинката ќе обезбедиме:
– флексибилна организација
– ведра атмосфера
– сигурно и потикнувачка средина( за игра, забава, дружење, развој)
– стручна помош и соработка (директор, педагог, музичар, главна медицинска сестра, врвен воспитно-згрижувачки кадар)
На Стручниот соработник – педагог можете секогаш да му се обратите за помош, за совет, за објаснување на Вашите потешкотии на телефон 02-3215-959.
Сите информации за дополнителните програми кои Вашето дете може да ги следи во градинката ќе ги добиете од учителките во групата, или кај раководителот на објектот.
Сите вработени во детската градинка на Општината Центар „Раде Јовчевски Корчагин” се грижиме Вашето дете да биде здраво, сигурно, слободно, самостојно, задоволно, весело, креативно, и СРЕЌНО!

Здравствени препораки

Почитувани родители, со цел да го подобриме здравјето на Вашето дете, во нашата градинка, препорачуваме детето да останува дома во следните случаи:
1.Ако детето е болно.
– Ако има температура над 37 степени.
– Невообичаени дамки на кожата, кожен осип.
– Пролив или повраќање.
– Вошливост.
– Отежнато или забрзано дишење.
– Конјуктивитис.
– Воспалено грло или потешкотии при голтање.
– Заразен кожен осип ( варичела, скарлатина).
– Присуство на стафилококна и стрептококна бактерија во нос или грло.
Со вакви симптоми детето не може да биде примено во градинка:
-Дете кое прима антибиотска терапија не смее да престојува во градинка
-Негувањето на децата дома кога се болни, е најдобар начин за спречување и ширење на заразните заболувања
-Детето кое ќе покаже одредени знаци на болест и го испратиме дома, Ве молиме да не информирате за неговата здравствена состојба.
– При повторно доаѓање во градинка, задолжително донесете медицинска белешка дека детето е здраво.
2. Лекови во градинката се забранети.

Како да ја корегирате буквата Л во домашни услови

Корекцијата на буквата „Л“ е честа појава кај децата кои го развиваат говорот. Ако детето има проблеми со правилното изговарање на оваа буква, може да се работи на нејзината корекција и во домашни услови, но тоа треба да се прави со трпение и систематски пристап. Еве неколку совети од логопедски аспект:

Корекција на позицијата на јазикот:

- За правилен изговор на буквата „Л“, јазикот треба да биде поставен на горниот дел од забите, позади горната усна. Објаснете му на детето дека треба да го постави јазикот на местото каде што би се допрел со врвот на горните заби.

- За да го поттикнете ова, може да му кажете да се насмевне и да го стави јазикот во позиција која ќе биде слична на таа кога се создава звукот „Л“.

Изговарање со примери:

- Почнете со едноставни зборови кои ја содржат буквата „Л“, како што се „лав“, „лоза“, „лустер“, и работете на нивниот правилен изговор.

- Кога детето ќе го изговори правилно, пофалете го. Почнете со бавни, јасни изговори и постепено зголемувајте брзината.

Јасен пример за изговор:

- Родителот може да изговара зборови и да покаже како правилно се поставува јазикот, а потоа детето треба да го повтори. Ова може да се прави пред огледало, така што детето ќе може да се види како ја поставува устата и јазикот.

Игра со звуците:

- Поиграјте со звуците на буквата „Л“ преку песни, рими или игри кои вклучуваат зборови со „Л“.

- Може да се прават и игри во кои детето ќе ги изговара различни зборови со буквата „Л“ додека се движи, пее или изведува некои физички активности за да го направи процесот забавен.

Постојано повторување:

- Редовното повторување е важно. Практикувајте ја буквата „Л“ секој ден, но не повеќе од 10-15 минути, за да не се создаде замор.

- Можете да создадете листа со зборови кои содржат „Л“ и да ги користите во различни контексти.

Започнете со изговарање во изолација:

- Прво, нека детето ги изговара само звуците или слоговите со „Л“ (на пример „ла“, „ле“, „ли“, „ло“, „лу“) пред да ги стави во целосни зборови.

Запишување и аудио записи:

- Детето може да се забавува со слушање на записи на зборови со „Л“ или да го снима сопствениот изговор, за да ги спореди и разбере на кој начин звучи точниот изговор.

Трпение и мотивација:

- Нема потреба да се брза. Процесот на корекција на говорот може да трае некое време. Важно е да се биде трпелив и да се поттикнува напредокот.

Ако проблемите со изговорот на буквата „Л“ продолжат или ако се јавуваат и други проблеми со говорот, најдобро би било да се консултирате со логопед за индивидуален план на работа и насоки.

Изготвил :

Логопед: Ивана Мирчески

Како да го поттикнете моторниот развој кај детето

Поттикнувањето на моторниот развој кај детето е важно за неговото физичко, но и когнитивно развивање. Еве неколку корисни совети за родителите:
Игри со движење: Потребно е детето да има време за слободно движење, бидејќи тоа ја подобрува моториката и му помага да ги развива основните моторни вештини (трчање, скокање, качување и сл.). Поиграјте се со него во дворот или во паркот.
Меѓусебни активности: Родителите може да се вклучат во активности кои бараат координација, како што се играње со топка, возење на велосипед, тротинет.
Градење и манипулирање со објекти: Играчки како што се коцки, пирамида, мозаици можат да помогнат во развојот на фини моторни вештини. Детето ќе учи како да манипулира со предметите и да ги развива своите прсти и раце.
Игри со песок или глина: Манипулирањето со различни материјали како песок, глина или пластелин ја поттикнува фината моторика и го развива чуството за текстура.
Прошетка и истражување на нови простори: Развојот на моториката не мора да се случува само дома. Прошетките по природата, истражување на различни текстури и површини ќе помогнат во подобрувањето на координацијата.
Поддршка за независност: Оставете го детето да проба да прави некои работи само, како што се облекување, јадење со прибор, користење на играчки и сл. Овие активности му помагаат на детето да развие самодоверба и да ги усоврши моторичките вештини.
Редовна физичка активност: Планирајте време за редовни физички активности, како што се прошетки, игра со топка, танцување, пливање или друга активност која ќе му помогне на детето да ги подобри своите моторни способности.
Пофалете и поттикнете: Кога детето ќе постигне нешто ново, покажете радост и охрабрување. Ова ќе го мотивира да продолжи да учи нови вештини.
Секој ден и секој момент може да биде можност за поттикнување на моторниот развој на детето. Важно е да се создаде средина која е активна и која им овозможува на децата да се движат и да учат преку игра.
Истовремено бидете трпеливи, бидејќи секое дете има различно темпо на развој.
Изготвил:
Дефектолог: Ивана Младеновска Јовановиќ

Што треба да се знае за „наградата и казната“ и како да ги применуваме во воспитувањето на децата

Како што е неопходно да им пружиме љубов на децата, да ги научиме на здрава исхрана, да им овозможиме здрав физички и ментален развој за да имаат здраво и среќно детство, но и за да имаат понатамошен здрав развој во среќни возрасни личности, така е неопходно и да ги дисциплинираме.
Дисциплинирањето на децата не е казнување затоа што направиле нешто погрешно, напротив, да се дисциплинира детето значи да се постават јасни граници и правила и да му се објаснат последиците од непочитување на правилата за да научи што е правилно, а што не, за да знае во иднина како да се однесува и како самото да го корегира своето однесување.
Многу често родителите и не знаат како вистински да го дисциплинираат детето, па дисциплинирањето како постапка го мешаат со казнувањето.
Во стручната литература се сретнуваат позитивни техники за дисциплинирање на децата:
ПРИЗНАНИЕ – кога детето постигнува одреден успех, кога се труди и покажува интерес и истрајност во работата треба да добие признание.
Признанието има поттикнувачко дејство, кое се изразува во облик на одобрување, охрабрување, поддршка.
ПОФАЛБАТА – се одобрува постапката на детето. Со тоа се јакне волјата, се развива самосвест и се поттикнува детето и понатаму да прави добри дела.
Пофалете ги децата кога се учтиви во комуникацијата со другите, кога ги следат вашите инструкции добро, кога се трудат да научат нешто ново. Многу е важно пофалбата да ја дадете веднаш кога ќе забележите добро однесување кај детето, фалете често, позитивно, и фалете го трудот не резултатот, затоа што така ја градите самодовербата кај детето.
НАГРАДАТА – претставува најмоќно средство за поттикнување, па треба умерено да се користи. Наградата не смее да стане цел сама по себе.
Наградата треба да делува мотивирачки врз детето, истата треба да биде реалистична, што значи дека мора да се осигурате дека може да ја исполните. Наградата мора да биде соодветна и праведна. Само така позитивно ќе влијае врз детскиот развој.
Наградувањето не мора и не треба секогаш да е материјално. Нематеријалните награди можат да бидат прошетка во парк, гледање филм, читање приказна пред спиење... Потрудете се повеќе да наградувате нематеријално отколку материјално.
КАЗНАТА – претставува метод со кој кај детето се корегира лошото однесување и не треба да се користи како издувен вентил за насобраниот бес и лутина.
Казната што родителите ја применуваат го менува начинот на кој детето се гледа себе си. Тоа предизвикува детето да помисли за себе дека е лошо, кога всушност поуката што треба да ја извлече е дека во моментот донело само лоша одлука што не треба да ја повтори. Она што е од особено значење е дека,
казната мора да биде прилагодена на возраста на детето. Докажано е дека физичката казна е мошне стресна за детето и тој стрес може да трае со години.
Родители бидете позитивни, помалку критикувајте и забележувајте ги повеќе позитивните реакции на Вашите деца, промени на подобро сигурно ќе има.
На децата не им е потребно совршенство.
Мудрите воспитувачи – родители ги учат децата на одговорност, а потоа ги фалат за нивните постигнувања.
Педагог,
Татјана Михајловска